TAC 阿踢近況
這是預早旅行前打好的！亦預備了一集loloknows！之後就抖下～
第三季的塞豆窿想改番用ipad畫呢～之前用wacom畫真的跟ipad直接畫落mon上面出黎效果有不同！又改呢～無所謂啦！鐘意就好嘛～反正可以慢慢來！
兩個星期後見～
EP27 返屋企瞓覺
同大家聽緊今集嘅NoNoNo嘅時候，我已經身處地球🌏嘅南半球，放緊假啦~所以聽埋今集，就要休息兩個禮拜，之後再同大家見面啦。
今日想同大家講嘅係返屋企瞓覺。
作為一個性格內向，不擅社交，睇樣樣嘢都唔多順眼嘅年輕版LoLo，中學時代真係冇乜參加嗰啲學校社團活動。就連課外活動，如果唔係學校限制左一定要揀最少一個學會參加，我諗我都會免得過就免，放學最好即刻返屋企。唯一有印象參加過嘅一個叫做園藝學會，最記得佢係因為交咗會費全年連啲泥土都冇俾我掂過，欣賞佢！夠徹底！用錢解決到嘅問題就唔係問題🫢
所以嗰陣時早會，見到嗰啲學生會候選內閣拉票啊，高材生喺外國返交流完返嚟做分享啊，都會覺得好犀利啊，企喺個台上面講嘢真係唔簡單！亦都會覺得識講嘢嘅人係會發出光芒㗎。不過話時話，明明啲阿Sir Miss日日企喺黑板前面講足全日，有冇咁大衝擊個喎，可能對於同年紀嘅人有呢個能力就覺得特別犀利。
直到讀A-Level，中文科係有一份卷叫「說話能力」，入便要考個人短講。即係俾個題目你然後叫你企喺度monologue 幾分鐘。準備考試過程之中，阿Sir就會不停咁樣安排同學做呢啲練習，即係大家坐定定準備同一個題目，最後阿Sir就會抽其中一兩個同學出去試下講。
嘩，要喺30個人咁人面前講嘢，其實都幾驚。
不過正所謂唔賭唔知時運高，唔講原來都唔知其實係講得到。
記得嗰一次我講嘅題目係講屋企。內容大概係，以當時18歲嘅角度，去講屋企對於我係啲乜嘢。嗯，乜個題目咁鬼空泛，又咁有抒情嘅空間架。
我諗同大家一樣嗰個年紀應該都係好適合傷春悲秋架吓，覺得學業成績唔夠好啊，覺得社交生活總有啲缺失啊，覺得自己好努力，但係人哋睇唔到呀，嗰啲咁嘅嘢啦。所以最後我講咗嘅係就算喺出面遇到啲咩困難，面對過啲咩難受嘅對待，只要返到屋企，就一定會有屋企人等緊你，就算你做得幾好定做得幾唔好，佢都係會盲目咁支持你。
係囉，講完之後啲同學拍手掌😂咁究竟係我說話能力都OK呀，定係個內容太似啲流行曲winning formula 咁樣，太容易感染到人。無論如何，果次之後，我就認為自己，其實都有少少天份。企人前面講嘢都OK嘅。
聽到呢度各位聽眾係咪覺得: 條友講咩呀？自己對住枝咪齋噏錄podcast都錄左廿幾集啦，而家先懷疑自己唔識講嘢。。。。。。咁口水多鍾意講嘢，同識得講嘢都唔必然係同時存在㗎嘛。
言歸正傳，我真係想同大家講嘅係無論出面幾風大雨大，日子幾難捱，只要記住早幾年嘅一句說話: 如果真係打到嚟，我地會返屋企瞓覺。
唔好執着係啲你控制唔到嘅事上面，攰嘅就唞唞啦，有咩瞓醒先講。
Comments