TAC 阿踢近況
嘿嘿嘿！因為之前畫萬聖節系列而停工左好耐，所以第3季塞豆窿故事未有進展～
索性改了個section名先！
但我還是有東西想報告一下呢！就係下星期我同撈奴會放大假去旅行～～～～
3年了呢！有點緊張？好似有少少的，因為太耐無去過旅行，唔記得左要點做呀，執d咩呀，準備d咩呀咁…連行程都好求其地係咁易知道有d咩可能可以去下就到時再睇心情！
我真的很想有休息的感覺…如果旅行仲忙過番工就慘了…所以今次應該帶少d相機，菲林帶一部就好了，即影即有可能唔帶了？！讓自己靜靜～
所以咯…
我地應該會停更podcast兩星期啦～ig story見！https://www.instagram.com/sdl_podcast
EP26 做好準備
今個星期想同大家講嘅係做好準備
聽講呢個世界有兩種人，一種係鍾意做好準備嘅人，另一種係到時先算啦。
我唔知你地係邊一種呢？
我本人就。。。
屋企人經常會引用一本書嘅名嚟comment我
“你所擔心的事 有九成是不會發生的”
即係腦入便預備得比較太多，Overthinking 果隻，成日忙於唸下啲嘢會唔順利呀，會好多差池啊，擔心呢樣擔心果樣。
樣樣性格其實都有好有唔好啦。
本來早有預備，應該係會令啲事情好順利咁進行啦，但係配合埋猶豫不決呢個性格，咁就好玩。
例如係我放假去買餸之前，會諗定要買啲咩食材啦，計劃好購物路線，拎定冰袋呀購物袋。不過正所謂，咁易俾你估到就唔係食神啦，一遇到食材冇貨就大件事，轉邊款好，轉A會唔會唔夾原本個dish？轉b好似好啲，但係要過2個商場果度買喎，拎住咁多嘢好難行囉，但係難得放假煮嘢食梗係盡量想煮好啲啦 (注:猶豫不決加處女座少少完美主義），喺呢個漫長嘅思考過程其實我係推住架購物車，喺超級市場嗰度旋兜嚟兜去，同一個貨架，可能經過三次😌
最後會點？最後當然係去咗遠處嗰度買啦，仲要好分心咁樣，買埋其他本來冇打算買嘅嘢添。成日都覺得買緊餸嘅女性，係呢個世界最大力嘅人，或者我搞錯咗啦係好心多嘅人先係最大力嘅人越買越多。
總有啲好處嘅，好處係好消磨時間囉，做好準備就係為咗目標為本，慳時間，最後就咁消磨左一個朝頭早。
做好準備，同有計劃，應該都又有少少唔同。我哋生活之中好多時都有一套計劃，短則有下個星期要同邊個去食飯，幾時去旅行呀，大時大節點樣安排節目，甚至其他人生大事。
但係現實往往就係：計劃總趕不及變化啦，好多嘢話嚟就嚟，話走就走，我諗大家都經歷過太多。可能都少不免會沉醉喺離別嘅傷感之中，可能亦都會忍唔住重複問點解事情要咁發生，可能會好嬲點解制度保護唔到應該受到保護嘅人，所有嘅情感都係真實嘅，都要面對，都要處理。
真係好老土，但係都要講，或者人生真係太多遺憾，今日唔知聽日事，你永遠都唔知邊一日係最後一日，邊一次見面係最後一次見面。所以想做啲咩就做咗先，嗰啲要諗吓，做唔做嘅嘢，似乎就真係唔係咁想做，咁就由佢啦 ，時間就係得咁多，係咯，有啲嘢就係唔輪到你準備。
Comments