EP25 無眼睇
今個星期想講嘅題目係無眼睇
唔知大家有無分心嘅煩惱呢，即係做做下一樣嘢，又想走去做第二樣嘢。就算真係控制到唔去行動，個心都係囉囉攣咁諗住第二樣嘢，不停同自己講：我遲咗睇會唔會錯過咗啲嘢㗎？又或者：我而家唔即刻搞會唔會唔記得㗎？
然之後我就發覺，所謂嘅分心，其實都係因為做緊嗰樣嘢好悶想玩下其他嘢，即係個人都係貪心嘅坐唔定咁囉。
所以就會變左越忙越得閒，即係明明知道太多野排住隊等住去做，但係又因為太多，呢樣做啲啲，果樣又做啲啲，再將唔係好想做果啲寫落reminder遲啲先做🫢，最後都無好好完成到一樣。
嘩，咁講到呢個性格咁差咁架，都唔係既，某啲情況底下，又係好野黎架喎，呢啲叫做multitasking。
例如係煮餸嗰陣，左邊一路炒緊洋蔥，右邊一路整緊豬扒，兩邊火都要睇，兩邊都要調味，第三個爐仲煲水準備加熱個湯包添，如果大家有煮開野，應該都好明白 d餸拎上枱果陣碟碟都夠熱係幾重要。
又洗碗果陣一定要同步開住收音機咁或者一路睇住英超直播😌，好似一次只做一樣野係太浪費時間咁。
不過又咁講，以上嘅分心呢個性格特質，通常都係啲無關痛癢嘅事上便嘅。(本人要強調工作嘅時候我係專心一致，全心全意，全情投入嘅。 🪖mode on) 例如係攤喺床睇書果陣，見到有個字唔識去google , goo goo 下又睇左第二樣野，又或者準備睇online 搵d資料，又會掛住同人text message傾閒偈，okay 架，最緊要預左自己打算hea hea 地咁，自在就好。
講左咁耐，其實我係想分享，早兩日終於搵到一個方法係令我專心做一件事！咁係用iphone screen time功能限制個app？定係意志力？ 答係花X蒸氣眼罩！帶左個眼罩之後咩都睇唔到，只係做一件事，就係等20分鐘，應該係近來除左瞓覺之外我唯一可以專心做既一件事！
er….聽到呢度會唔會覺得…「cher 咁咋嘛？」但對於平時坐車都一定要聽airpod,行路（非馬路）都look緊電話既我，真係覺得好難得，值得用一集黎講😌
第三季塞豆窿進度報告 － by TAC 阿踢
係咪應該將個title改做TAC的近況會比較貼題？？嘿
今個星期在趕星期三就要開始，跟繪師飛雲合作的接龍故事！
中間有畫少少萬聖節系列圖～生活充實，放一幅出黎先～
上星期講到自己唔善長畫女仔，
所以就立即挑戰一下！
覺得不錯呀～可能之後可以練習練習～
Bình luận