終於來到最後一天了！分享卡通系列將會暫停一下～
不竟也進行了年半呢～
完成這系列很滿足也很掙扎！覺得還有一些想分享的於卡通未有分享到噢！
或者未來想再開始時就會再開始！第一季先這樣結束了～
之後這電子報就暫時報lolo knows和一些想寫的話好了！繼續幫星期一的你／我打打氣！
謝謝一路支持的你！
分享兒時看過的卡通片
某個Something Monday開始
我們會分一部份說說自己兒時看過的卡通片給大家
我們是成長在電視汁撈飯的時代
我們是那時候的卡通片及兒童節目養大的塞豆窿
製作動畫時 久不久也會想起 兒時看過的卡通點滴
大家好！我係阿TAC，今天想跟大家分享的是「幻法小魔星」！
我是因為小魔星才認識日本的章魚燒的！是否日本的卡通人物都有各自喜歡吃的東西？小魔星愛吃章魚燒，叮噹愛吃豆沙包；之前我畫光仔亦因此而被賦予喜歡吃咖喱魚蛋！
記憶深刻的是楊采尼首主題曲！
同叮噹的設定有點相似？主角本丸運動讀書都好水皮又想溝伊代菜（伊代菜好似係打排球的）。本丸俾個菠蘿頭大大份的人同個招招積積的同學仔蝦！然後唔夠勁的時候本丸會叫小魔星用魔法幫自己訓練！（大雄通常係用工具出術的多～這點我比較喜歡本丸！）明明果果個樣都好大個, 結果佢地原來係小學生～
小魔星條脷可以變好長去lam人！初時係因為俾人打完的本丸番到自己屋企諗住搵爸爸教佢空手道跆拳道等下次有人打佢的時候唔洗咁慘…點知爸爸瞓左，旁邊有本魔法書放左0係度，本丸睇唔明又覺得無人幫到佢所以就大叫了一聲：真係好煩呀…然後小魔星就出現0係本丸面前啦～原來「真係好煩」就係召喚小魔星的咒語～
記得後來有一集本丸死了！！！！！小魔星為了想本丸復活就帶了本丸的靈魂去魔法國搵自己的媽媽救本丸，後黎佢兩個去收集d印花再搵左個唔知咩仙人幫佢番生～然後小魔星就留左0係魔法國，本丸佢地後來為了召喚番小魔星出黎又番去爸爸間書房試下唸咒語！結果忘記了咒語…其他人誤打誤撞大叫了：「打搞晒」同「正飯桶」，召喚了其他魔法師，包括鐘意小魔星的霧娜同鐘意霧娜的勒巴～故事的後半好似係不斷勒巴想討好霧娜，然後霧娜不斷纏住小魔星！其他的都無乜印象lu～
上網搵到有廣東話配音的小魔星，大家有興趣可以睇番啦～ https://youtu.be/CPNKUEf8kEk
你對小魔星的印象又是如何？可以留言告訴我！
今集係最後一集啦～終於倒數完畢！分享卡通系列將會暫停一下～我們的youtube頻道都會暫時休息一下！不竟也進行了年半呢～完成這系列很滿足也很掙扎！覺得還有一些想分享的於卡通未有分享到噢！或者未來想再開始時就會再開始！第一季先這樣結束了～多謝你地一年多以黎的支持呀～後會有期！再見！
塞豆窿上
寫在錄完音發現無開咪的星期日下午…
Lolo Knows － by 撈奴
EP.20 光榮結業
今日想同大家講嘅係光榮結業。
做生意嘅嘢成功營運得到，有錢賺就梗係好啦。當然計錯數搞唔掂要關門大吉都常有發生。不過我諗喺有錢賺同執笠之間，應該都係有一百萬個唔同層次嘅困難要處理。
租金，產品質素，人力資源，品牌定位同知名度，口碑，真係樣樣嘢都要兼顧。最難搞應該係外在嗰啲控制唔到嘅嘢。好似香港地咁，朝朝瞓醒都有古怪嘅事情發生，營商環境千變萬化，當然都係趨向越嚟越惡劣。開間餐廳仔先算，無啦啦又冇得開，無啦啦又要裝電話app，幾多個人可以一齊坐，幾多個人又唔可以一齊坐，呢幾年真係被人玩到tum tum 轉。
一收到風話準備唔做，通常又會大排長龍，預約爆滿。有啲口痕友會話：「唓～平時又唔見你幫襯，而家執啦你先至嚟趁熱鬧。」咁人哋之前日日去，又話你知咩，再講呀臨別秋波想去幫襯吓，食多最後一次都真係無可厚非架喎。預咗去到要排隊，付出時間，仲要人多繁忙出品未必有以前咁好都係自己選擇啫。
口痕友又會話：「嗰間嘢好食過啦，都唔係特別好味啫～」咁我諗每一樣嘢，喺唔同人心目中都有唔同重量嘅，就好似有一啲餐廳/味道對你嚟講就係有特別嘅意義/回憶。
成日都覺得嗰啲對生活冇太大感覺嘅人，可能都係好壓抑表達情感，會唔會係受過傷好怕投入感情，定係純粹功利主義，好怕花時間係啲冇直接回報嘅既野度？
至於點解結業既時候想要光榮架呢，可能就好似啲人退休咁囉咁，喺嗰段時間入面付出所有，對得住自己咁樣去結束一段旅程，然之後進入人生另一個階段。
不過我諗「光榮結業」呢幾個字，應該係人哋俾嘅評價會馨香啲。如果走到去營業嘅最後時間，嗰陣都冇人覺得可惜，應該唔多唔少會懷疑成個經營係咪白過🥹
好似活一世人咁，佢嘅出現為其他人嘅生命帶來一啲鼓勵，一啲能量，為世界帶來一點微笑。到真係告別嗰日，大家都會多謝佢，唔捨得佢。
講講吓，今個星期放假，都係趁幫襯開嗰間小食店仲喺度，去篤返串魚蛋先。
Comments