EP22 環保
今日想講嘅係環保♻️。
我唸大家都試過得到呢句:唔洗袋呀？多謝支持環保~
到底阿店員係咪真心多謝我架呢？應該係嘅，因為我慳左個膠袋對個世界都有得益呀！又再唸係咪咁做得果少少源頭減廢已經值得比人多謝，我平食好多外賣，用好多即棄餐盒餐具，又成日用購物平台買野速遞送貨超級過度包裝，仲要天生鼻敏感，鼻水水，紙巾使用速度異於常人，print 文件未對清楚就㩒左制一拎上手就見到打錯字又要print過。我唸我聽到果句多謝時候係心虛嘅。
講起環保，好難！覺得係一種好需要有人不斷提同埋極度方便先有機會做到嘅。
記得好耐之前喺超級市場見過有個小朋友指住冬天用嘅暖手蛋問媽咪:可唔可以買呢個暖住對手。媽咪答佢：唔好啦，用呢啲只係得好短時間效用又浪費，我地環保啲啦！
嗱，有人講有人提就會成風氣。
自從幾年前開始有綠在區區，每個區都有一個大型回收站，唔洗再擔心屋苑或者街口嗰啲回收鐵箱，原來大家好努力分好類之後，到最後所有野殊途同歸都係返晒去堆填區。硬件有啦，咁點呢？見過好多人其實都有心想做，但係阻力太大。例如係外賣碗，食完要洗咗先可以回收，佢平時屋企啲碗都唔洗佢掂，好啦到終於肯出手洗外賣兜呢，又未必喺屋企附近有回收點。呢個時候如果有人可以幫手，做group埋啲野一次過拎去果個，其他人又易左達到！
除左方便，衞生又係要考慮。好似大家已經帶左一世嘅口罩，有啲係獨立包裝好乾淨，佢聲稱個膠套係自己會分解，咁用家又好似用得安心啲，但其實分解好似都要50年？咁用佢係咪真環保定唔係呢。我知道有其他一百種方法架，例如可以買啲盒裝再自己用袋裝好拎出街，下次又用番同一個袋之類啦。。。。
講到尾，環保對我來講就係喺以下呢兩個狀態之間跳來來去：
🗣️咁樣好浪費喎(/人地會覺得我好浪費喎)
同説服自己太麻煩下次先啦
所以話可能每日生活可能會產生十次浪費，哪怕係只係做到減一次，或者提到人，幫到人減一次，都係好嘅。
今時今日生活咁唔容易，希望大家都學識到
欣賞自己用過力達到到嘅事，放過自己太疲累而錯過左嘅事啦。
第三季塞豆窿進度報告 － by TAC 阿踢
依個星期有開始畫第3季的漫畫～
然後有開始畫萬聖節的圖！
覺得都畫得不錯呢～我好喜歡！
所以想一星期畫一兩張～
沉日阿bro想我幫佢畫個圖做backdrop…
老實講我真係無整開依d…又唔係畫得好睇…自信心係零…
然後時間勁趕…星期4就要…
然後其實前排工作令身心很累 好想放假有得抖下…
見佢話無人肯幫佢就頂硬上…
Comments