看到這個一年前畫的華也高…
那些line work…
對比最近畫的圖就覺得
這一年下來我的畫功似乎真的有進步呢～
畫畫音樂廚藝運動打機全部都係持續做就會有進步！
如果大家最近覺得灰灰地？可以搵d野學下呀～
前兩個blog有提到倒數到第1集之後仲繼唔繼續做youtube影片
本來做這個分享卡通系列就是想每星期練習畫一張圖
目標是52集剛好一年！
後來將blog的內容變做youtube影片～
今個星期是第8集，仲有兩個月就補完所有畫左的卡通～
都係一個小milestone！
如果要數還未畫和未介紹的卡通的話大約有以下這些：
熱血最強
伙頭智多星
皇家雙妹嘜
婚莎小天使
機甲武士劍
魔法少年
飛天少女娜汀亞
鬥球小子
bb與我
晴天pigpig
幽遊白書
相聚一刻
浪客劍心
幻法雙子星
高達
keroro
加菲貓
popeye
仙樂飄飄處處聞
80日環遊世界
EVA
小蜜蜂尋親記
大姆子姑娘
柯南
onepiece
動物奧運會
以上有部份應該係搵唔到資料無咩特別野可以整影片架啦～
有d有動畫的，但其實我只係睇過漫畫…又唔想介紹…
仲有d係仲未完的動漫，如柯南和onepiece～
而且比較hit，大把人做影片講得深入過我～
7除8扣就得番12－3套可以整！
如果我倒數完之後停更兩三個月
放一個長假之後得閒再開始番介紹卡通好似都行得通呀～
只係對依家十龜左youtube果d人有d唔好意思～haha
不過我諗鐘意懷舊野的人對有無更新應該都無咩所謂的
暫時係咁諗 未決定的～
分享兒時看過的卡通片
某個Something Monday開始
我們會分一部份說說自己兒時看過的卡通片給大家
我們是成長在電視汁撈飯的時代
我們是那時候的卡通片及兒童節目養大的塞豆窿
製作動畫時 久不久也會想起 兒時看過的卡通點滴
大家好！我係阿TAC，今天想跟大家分享的是「狂歡三寶」！
今集多錯字但未有時間改～請見諒～會盡快！
狂歡三寶有三位主角：華納兄弟（WarnerBrothers：可高和也高）同埋佢地的妹妹小冬（Dot）！搵資料先知道，原來佢地的名係因為華納兄弟公司："Warner Bros." Warner Bros and their sister "." !
睇wikipedia發現，最初創立三個主角時本來是三隻鴨仔，但製作人覺得已經太多卡通用鴨了～對手迪士尼又有唐老鴨，史高治，再上一代又有彊屍奇鴨，即使係華納的卡通系列都經常出現鴨：柏奇和德飛等；所以佢地選了其他常見動物如貓狗﹑兔仔﹑老鼠的特徵：有尾巴耳朵鼻哥等來創作佢地，連作者都講唔出佢地三個係咩物種！
至於點解佢地會係黑白色呢？就因為當時故事係將佢地設定為1930年代誕生（依套卡通片是1993年咁上下製作的），而30年代的卡通片都係黑白色的，好似米奇老鼠﹑FELIX THE CAT那些～
而佢地的誕生經過係咁的：1930年代的華納兄弟建立了一個全新的動畫部門，仲創立了第一批的動畫明星！就係佢地三個！不過在創作過程中因為佢地三個失晒控…搗亂整個片場！所以華納的高層將佢地三個封印在華納片場的水塔裡面～亦無幫佢地推出任何演出影片！直至到了90年代…有一日佢地三個由水塔果度偷走左出黎！
情節通常係佢地在逃避要捉佢地的看更﹑有個無頭髮的心理醫生要心理輔導佢地變得“正常？“，有集有講到一開始個醫生仲後生的時候係有濃密的頭髮，但最後被佢地三個激到自己搣甩晒自己的頭髮…都咪話唔激動！仲有依個心理醫生有個0係故事入面算娥娜多姿的護士，可高和也高一件到佢就會狼狗咁叫HELLO~~NURSE! 小冬雖然覺得好無奈，但其實佢見到大隻的型男一樣會跳上去對方身上格硬要人公主抱…
細個勁鐘意睇狂歡三寶，依家諗番最鐘意的係也高，佢有咩睇唔順眼就黎手拎個鎚出黎dup扁佢，或者將所有野食晒落肚！總知就係鐘意點就點； 在hollywood bowl仲表演捽手發出手汗聲或用胃氣黎進行音樂表演添！
對可高最有印象係佢唱晒成本字典出黎，仲有唱晒當時d國家名～果時捷克同斯洛伐克都未分開，仲係同一個國家！每次都唱到最後都有段死唔斷氣的歌詞！配音的人真係好厲害！
除了佢地三個之外，其實狂歡三寶仲有分幾個單元，好似“pinky and the brain“果兩隻實驗室白老鼠，一個係白痴pinky一個係每日都想統治全世界的brain！每集都諗唔同方法去統治世界，但每次唔係被pinky叉wor左就係條橋唔得失敗左！仲有三隻白鴿，其中一隻叫四季（係比較純品的），另一隻叫百士通，好暴燥成日打四季，仲有一個唔記得名，好似係大佬的角色，叫四季同百士通做野！通常係馬路的中間有塊麵包佢地好想食，但車來車往佢地三個用唔同方法都係會俾d車車扁…好可憐…去到想放棄的時候，就會有隻教父咁的老白鴿會行出黎～佢一出場就會伸隻腳出黎俾三隻白鴿錫佢腳指…（嘔），類似係行個大禮咁，表示好尊重佢！而佢德高望重到，只要佢一伸佢隻腳落馬路邊，側邊d人類的車就會全部剎停d車…佢就施施然行到馬路中間食左塊面包！
中間仲會有d小劇場，例如“好主意壞主意“～ 其實好多都好好笑！最記得果集係：好主意：吸一啖氣然後跳入水，壞主意：跳入水然後吸一啖氣！依然其實有復刻版狂歡三寶2020，好似係將d畫畫過變靚d～大家可以0係youtube search番黎睇～依套卡通老實講聽原著英文配音比較好笑～
以上就是我對狂歡三寶的印象啦！
唔知你對狂歡三寶的印象又是如何？可以留言話我知～
如果想密切注意我們影片的話，請follow我們的IG ＠suckdouloan 和 subscribe我們塞豆窿youtube的頻道呀！去spotify聽我地的podcast呀！
喜歡的話請訂閱我們的電子報，每星期一早上七時搶先電郵給你！
請繼續支持我地！ 下個星期一見～
塞豆窿上
寫在日已落的星期日晚上
Lolo Knows － by 撈奴
EP13 保持距離
話說有一日，喺條街度等過馬路
等吓等吓前面一位女子突然之間轉身射個3分波
用外方語言問我xx大廈係咪咁樣行
仲喺展示佢電話入面地圖嘅時候，哄埋左一步
嚇到我即時退後，
回過神嚟之後就睇吓佢其實想去邊啦，由於佢
唔係用Google 地圖，我望唔到個目的地。根據佢口述大廈名，我就喺自己個google map嗰度輸入查詢下啦。
都唔知係佢講錯定係我聽錯，總之就搵唔到啦，
呢個時候又咁啱轉綠燈喇喎，咁我唯有同佢講「不知道」跟住就過馬路走咗啦😮💨
今時今日喺條街問路就通常都係長輩啦，覺得手執電話地圖app，應該邊度都去到啦。對於幫唔到佢都有少少唔好意思嘅，希望佢搵到一個識教佢嘅人。
呢件事令我諗起曾經有朋友話呢，佢非常害怕呢啲陌生人同佢嘅互動。
以問路來講呢，佢嘅條件反射，係會直接隨便指一個方向，講:「行嗰邊」，之後危險！速逃！目的就係為咗可以盡快逃離呢一個尷尬的對話。
原來世界上真係有唔同程度嘅社恐寶寶，I am not alone 🤭
等我再分享多兩樣我同世人 「保持距離」嘅例子
放工如果搭𨋢撞到識得嘅人，我會盡最大努力一路同對方閒聊，一路喺我腦海入面以每秒1000轉嘅速度去記憶下佢住喺邊，等陣出咗公司門口會直行定轉左定轉右，確保我可以同佢行相反嘅方向。
仲有一個係最近我將一個非常龐大嘅headphone🎧，真有線頭戴式嗰啲呢，帶咗返公司，主要係食lunch嘅時候帶住，咁其他同事就唔會過嚟展開對話，再加上大家細個睇咁多掌門人估歌仔，一定要會以為我帶住個headphone就聽唔到對方講咩㗎啦，所以講兩句就會知難而退。。。我係唔會話俾你知其實呢個型號其實係開放式耳機。。。
歡迎提供其他保持距離嘅好辦法🫣
祝大家對自己控制唔到嘅嘢唔好捉得咁緊啦，放過自己啦～
如果想聽番之前的LOLO KNOWS，可以睇番之前的blog架！
第三季塞豆窿進度報告 － by TAC 阿踢
著手改動故事中！
進度：暫時改了第1集
Kommentare