上星期節目調動，原定的分享兒時卡通片的點滴星期一將改為播放塞豆窿發噏風4：旅行之咩咩（上集）！未睇的快d去追番啦～
之前因為mental canvas的app太型！令我依個唔買蘋果產品的人終於花錢入坑！（用緊的imac是工作人員a的～）所以黎緊點滴星期一將會試下用mental canvas試整動畫！希望可以帶多d驚喜！yeah～
但係咁樣的話我做點滴星期一的流程就會唔同左少少～
以前的流程係：
想好要分享的動畫
search d 圖黎試下畫（這是我原來要做分享的原意～我是當練習畫公仔的！）
用clip studio paint畫好了ig圖，就開始寫這個blog！
然後再諗下點畫自己同配個咩背景來做動態說書人的部份
10－13秒的動態做好了就錄音
剪接音擋
剪影片，加插原作圖片令3，4分鐘內容有點變化
製作youtube的thumbnail，podcast的thumbnail
upload上 youtube同podcast channel
ig post，reel，story，fb page宣傳！
如果順利的話，通常這樣要用上一個星期六晚上加星期日全日，在寫blog時最花時間！
如果用mental canvas來畫IG那個圖及說書部份要溶合的話，就要先寫blog和動態劇本，亦都要畫多幾個畫來for情景用！
可能初頭就咁用mental canvas的筆來試下！之後再用clip studio畫圖再load入去，再之後研究下procreate～一路有新野學真係感覺好好！
分享兒時看過的卡通片
某個Something Monday開始
我們會分一部份說說自己兒時看過的卡通片給大家
我們是成長在電視汁撈飯的時代
我們是那時候的卡通片及兒童節目養大的塞豆窿
製作動畫時 久不久也會想起 兒時看過的卡通點滴
或多或少是這個原故 才有現在製作卡通影片的衝動！
今天想跟大家分享的是「同班同學」！
因為之前都係講d打打殺殺的戰鬥努力奮鬥挫敗挑戰片！今次就轉下口味講d戀愛卡通：同班同學！有無人記得架呢？
應該望到主角會有少少印象吧？男主角5年級插班生 勇之助～穿綠白間polo，風度翩翩斯斯文文，高大又踢足球，萬人迷咁款！依家諗諗下我到依家都喜歡買綠白粗間的衫，買親polo shirt大都會揀綠色～～～
女主角豆豆暗戀勇之助，另一邊有個千金小姐陽子積極主動直接地向勇之助派心心，勇之助好好先生（還是渣男？嘿）都不會避嫌；豆豆又無自信又不太主動，經常好多內心戲要估勇之助係咪鐘意陽子，又會無啦啦嬲勇之助，調位就諗會唔會有機會同勇之助一齊坐，做畫劇又諗有無得做男女主角…其實都幾真實！
這卡通都是在玩暗戀～豆豆暗戀勇之助，有個叫健仔的男同學暗戀豆豆，豆豆有個fd好似叫小香就暗戀健仔！類似話三年班的時候有日落雨小香唔記得帶遮，健仔俾左自己把遮佢用，自己淋雨番屋企，小香好感動於是開始鐘意健仔～情竇初開…（有無少少諗起唐寧果套記得香蕉成熟時～）
動畫的結局是勇之助和豆豆終於拍拖，在公園拍拖時勇之助救豆豆而被打傷，最後竟然接吻了，仲一度擔心接吻後是否會懷孕…勇之助表示如果真係會有bb就生落黎，我們一同養育bb吧。但不久之後勇之助因為爸爸的工作而要去美國…唉！在歡送會的時候陽子竟然同勇之助告白！進激之女生！勇之助拒絕了陽子，話自己喜歡的係豆豆～（脫離渣男形象！）豆豆同勇之助0係櫻花樹下講再見～當年莫講話移民，搬屋轉校之後已經等於不會再見了～這場初戀就這樣結束！甜得黎有點澀澀的～
結局係open end的，長大後會唔會再重逢？再相戀？定係就這樣無疾而終…
然後我為了打這篇分享搵資料時，發現漫畫版原來有畫豆豆之後昇中學入了網球社，識了個一齊打波的男仔龍一，個男仔直接表白猛烈追求，豆豆終於同左佢一齊（唔通為了一個聯絡唔到的人放棄自己人生咩～觀點與角度啦，都有人覺得豆豆是渣女。）！點知中二（用香港的講法啦～）的時候，勇之助竟然番左黎日本仲插班同豆豆同班添…（有無得咁岩呀又…）咁豆豆都唔知應唔應該話俾勇之助知道佢同龍一拍拖的事。最後勇之助都係知道左的，竟然話要同龍一競爭…（想點…）未完…一爭就爭到上中三，然後勇之助個老豆又要去美國，勇之助又要走…（搞住晒…佢真係渣男）最過份係豆豆竟然確認自己仲係鐘意勇之助，所以在機場交換了手錶做信物？！（點解呀豆豆…我接受唔到呀…佢玩你架咋！！搞完一大輪就走…兩次架啦！你醒未呀豆豆？？）
最後最後最後，20歲的豆豆同勇之助結了婚～過多幾年阿健仔同小香都結婚，所有同學仔都出現番！
你對同班同學仲有無印象呢？ 請留言告訴我們！
想密切注意我們影片的話，請follow我們的IG ＠suckdouloan 和 subscribe我們塞豆窿youtube的頻道呀！最近還有podcast呢～ 喜歡的話請訂閱我們的電子報，每星期一早上七時搶先電郵給你！ 感謝你們繼續支持！
塞豆窿上
寫在星期日的中午
Comments